Extreme Precision

Mikrometro batetik beherako perdoi dimentsional edo geometrikoak eta zimurtasun nanometrikoak dituzten osagaiak fabrikatzeko, azken emaitzan eragina duen edozein parametroren tamaina neurtzeko gai izan behar da, ondoren orekatu ahal izateko. Gure gaitasun metrologikoei (kontaktu bidez edo kontakturik gabe) eta instituzioekin edo bezero garrantzitsuekin ditugun korrelazio-estrategiei esker, prozesuak eta produktuak berma ditzakegu.

Gure kasuan, fabrikazioaren aurreko etapa da metrologia; izan ere, aukera ematen baitigu produkzio-baliabideen errepikagarritasuna egiaztatzeko eta makinak eta haien osagarriak hobetzeko edo pertsonalizatzeko proiektuak gure gain hartzeko, merkatuan eskuragarri dauden aukerak gainditzen dituzten sendotasun- eta doitasun-mailak lor ditzagun.

Pieza konplexuak fabrikatzeko askotariko prozesuak eta teknologiak behar izaten dira, eta Egilen badakigu gure gaitasunak elkarren artean bateratzen diseinu konplexuenak gauzatu ahal izateko: ardatz anitzeko artezketa, artezketa laua, koordenatu bidezko artezketa, ultra-doitasunezko EDM (sartze eta hari bidezkoa), ardatz anitzeko mekanizazioa air-bearing makinetan, mikrofresaketa eta engranaje berezien artezketa, torneaketa hibridoa, brotxaketa, orekatzea, lapeaketa, txartaketa... Plataforma industrial aurreratua, integrala, teknologia anitzekoa eta etengabe eboluzionatzen ari dena, aurrekontu oso altuko sistemen edo misioen emaitza baldintzatzeko gai diren osagaiak hezurmamitu ahal izateko.

Gure indarguneetako bat doitasun handiko osagaiak edo osagai oso deformagarriak modu automatizatuan eta serie handietan fabrikatzeko dugun gaitasuna da; izan ere, horrelako osagaiek iterazioak eta konpentsazio-begiztak behar izaten baitituzte. Horri esker, etorkizuneko sistema dinamikoak garatzen dituzten OEM handien partner naturalak gara, eta prozesu osoan zehar laguntzen diegu, prototipoa egitetik robotizazio handiko zelula produktiboak ezartzeraino.

Oso ondo ezagutzen dugu makinen, tresnen eta material exotikoenen zinematika. Balio handiko merkatu-hobietan egindako ibilbideari esker, fabrikatu beharreko piezen ingurunea ulertzen dugu eta haien funtzioa hobetzeko soluzio adimentsuagoak erabiltzen ditugu.

Horregatik, aliatu ezin hobea gara konplexutasun handiko proiektuetan lan egiteko eta definitzen laguntzeko, fabrika daitekeenaren mugak ondo ezagutzen ditugulako.